ILOILO CITY – Gin-relieve sang pamunuan sang Bureau of Jail Management and Penology (BJMP) Region 6, ang apat ka mga jail guards sang Iloilo District Jail (IDJ) sa Barangay Nanga, Pototan, Iloilo.
Sa exclusive interview sang Bombo Radyo Iloilo kay Jail Supt. Gilbert Peremne, assistant regional director sang BJMP Region 6, ginpahayag sini nga ang nasambit nga tikang ang kasunod sang natabo nga pagka-aresto sa drug personality nga si Josefina Doctora, 42, kag pumuluyo sang Ilaya Poblacion, Barotac Nuevo, Iloilo sa diin gin-ako sini nga nagakuha ini sang iligal nga droga sa sulod sang IDJ.
Suno kay Peremne, katuyuan sang pag-relieve sa puwesto sang mga jail guards amo nga indi maapektuhan ang imbestigasyon sang BJMP may kaangtanan sa mga gina-alegar pagbaligya sang iligal nga droga sa presuhan.
Nagpamalibad naman si Peremne nga hingadlan ang apat ka mga jail guards kag ginpasalig nga ila ini hingadlan sa ti-on nga matapos na ang imbestigasyon kag mapamatud-an nga may kahilabtanan ang mga ini sa pagduging sang iligal nga droga sa IDJ.
Apang gin-athag naman sini nga wala gin-relieve sa puwesto ang jail warden sang IDJ nga si Jail Senior Inspector Abner Zamora bangud ginasuportahan nila ang iya pagdumala sa presuhan.
Sa subong, yara sa regional office sang BJMP ang apat ka mga jail guards.