Kahilabtanan sang jail guards sa illegal drug proliferation sa BJMP-Iloilo, ginaimbestigaran na

ILOILO CITY – Ginsuguran na sang Bureau of Jail Management and Penology (BJMP) ang imbestigasyon sa kahilabtanan sang mga jail guards sa proliferation ukon paglapta sang iligal nga droga sa sulod sang Iloilo District Jail (IDJ).
Sa interview sang Bombo Radyo, ginpahayag ni Senior Jail Oficer 3 Leo Lacerna, team leader sang gintukod nga investigating team, ginpili nila nga indi anay paghingadlan ang apat ka mga jail guards nga ginsipa sa puwesto tungod indi pa man sila makabig nga mga kahimbon sang ginatudlo nga yara sa kalakalan sang iligal nga droga sa sulod sang district jail.
Kinahanglan man nga tenporaryo anay sila nga i-relieve agud indi maimpluwensiyahan ang ginapatigayon nga imbestigasyon.
Aminado si Lacerna nga panugod pa gid lamang ini sang mas malapad nga imbestigasyon ilabi pa nga nagasandig sila sa mga intelligence reports nga nakalab-ot sa ila tuhoy sa operasyon sang illegal drugs sa sulod sang Iloilo District Jail.