ILOILO CITY – Nadakpan ang mag-asawa nga high value target kag wanted sa mga otoridad, sa buy bust operation nga ginpatigayon sa Monica Blumentritt, City Proper kagab-i.
Ang mga arestado amu sanday Analyn Campos Ituriaga nga high value target no. 8 sang Police Station 1, kag bana sini nga si Mariano Ituriaga nga may pending warrant of arrest sa kaso nga attempted homicide.
Suno kay Police Chief Insp. Aldrin Lamera sang Police Station 1, madugay na nga ginamonitor si Analyn, sa diin miyembro ini sadto sang Odicta Drug Group, apang bangud naghina ang supply sang droga, nagakuha na ini subong sa Bacolod kag ginabaligya sa City Proper.
Narekober sa mga arestado ang anum ka sachet sang suspected shabu kag P1,000 nga buy bust money.
Gilayon naman nga ginpanginwala ni Analyn nga nagabaligya ini sang iligal nga droga.
Samtang, nagapati ang iloy sang nadakpan nga si Mariano Ituriaga nga planted ang ginhimo sang kapulisan sa buy bust operation sa Monica Blumentritt, City Proper.
Suno kay Bebe Navarro, ila lang nga ginkakibot ang pagsulod sang mga pulis kag nagpang-ukay sa balay, sa diin ginaalegar sini nga ginpangdala pa sang mga pulis ang kwarta kag mga alahas.
Gin-ako ni Navarro nga hangkilan nga kawatan si Analyn apang madugay na suno sa iya nag-untat sa paggamit sang iligal nga droga kag kompleto man ini sa papeles nga nag-gradwar na ini sa drug rehabilitation sa Kampo Delgado.