ILOILO CITY – Gindesignar ni Presidente Rodrigo Duterte si Antique Governor Rhodora Cadiao bilang chairperson sang Regional Development Council (RDC).
Ini ang ginkumpirma mismo ni Cadiao sa exclusive interview sa Bombo Radyo Iloilo.
Ginpasalamatan sang gobernador ang Presidente sa pagsalig sa iya liderato matapos ang madinalag-on nga pag-host sang Palarong Pambansa 2017.
Suno kay Cadiao, magasentro ang iya liderato sa salalama nga pagpasanyog sang mga kaprobinsyahan sa rehiyon paagi sa mga tourism kag infrastructure projects.
May kaangtanan sini, dalagko nga mga proyekto ang nagahulat sa Region 6.
Kalakip diri ang taytay nga magaangot sa Iloilo City, Guimaras kag Negros Occidental; Jalaur River dam project nga magahatag sang irigasyon kag makuhaan sang supply sang tubig kag koryente sa probinsiya sang Iloilo.
Magatukod man sang internationa port para sa mga cruise ship nga nagadungka sa Boracay, samtang plano nga butangan sang airport ang Isla de Gigantes nga isa ka major tourist attraction karon sa Iloilo, samtang himuon man nga international container port ang Dumangas port sa Iloilo.
Nagapabilin man nga buhi suno kay Cadiao ang railway project nga magaangot sa Iloilo, Capiz kag Aklan.
Suno sa gobernador, ang nasambit nga mga proyekto ang kabahin sang vision ni Presidente Duterte nga Pilipinas 2040.