ILOILO CITY – Nagapati ang isa ka political analyst nga isa ka mabug-at nga pagpanghangkat kay Sen. Alan Peter Cayetano ang mangin tiglikom sang Department of Foreign Affairs (DFA).
Sa exclusive interview sang Bombo Radyo kay Mr. Ramon Casiple, ginpahayag sini nga apisar nagserbe bilang committee chairman sang Foreign Affairs si Cayetano sa Senado, apang wala man ini sang may inubrahan.
Suno kay Casiple, indi diplomatiko nga sahi sang senador si Cayetano ukon wala
sang ideya kun paano ang pagnegosyar sa iban nga mga pungsod.
Nagakadapat man suno sa political analyst nga kontrolon ni Cayetano ang iya batasan sa ti-on nga pormal na ini nga magpungko bilang DFA secretary.
Ini bangud suno kay Casiple, makapila ka beses na ini nga nagtambong sa mga hearing sa Senado sa diin nakita sini si Cayetano nga naga-alburuto sa kaakig sa mga kaangay niya nga mga senador.
Sa pihak sini, nagakadapat nga hatagan man sang ti-on si Cayetano agud mapamatud-an sini ang iya nga ikasarang.