ILOILO CITY – Patay ang isa ka menor-de-edad nga lalaki matapos nadayunan sang nagahampang sang bitay-bitay sa Leganes, Iloilo.
Ang biktima amo si alyas Nonoy, 13, kag Grade 6 pupil sang Bugsuan Elementary School sa nasambit nga banwa.
Sa interview sang Bombo Radyo Iloilo kay Police Senior Inspector Liza Nofuente, hepe sang Leganes Municipal Police Station, ginpahayag sini nga nakit-an na lang ang biktima sang utod sini nga nagabitay na sa ika-duha nga panalgan sang ila balay.
Ginapakay-o suno sa hepe ang balay sang biktima sa diin nakit-an sini ang kahoy nga tapikan kuntani sang kisame kag ginsab-it sini ang higot kag nagbitay-bitay.
Suno sa hepe, gin-ako sang himata sang biktima nga masami ini nga nagahampang sang bitay-bitay kag apisar makapila ka beses nila ini nga ginasaway, wala ini nagpamati tubtob nga nadayunan na gid ini kag napatay.
Wala naman sang plano ang pamilya nga ipa-autopsy ang bangkay sang biktima bangud kumbinsido ang mga ini nga aksidente ang natabo.