ILOILO CITY – Gin-relieve na sa puwesto ang 32 ka mga jail guards sang Iloilo District Jail (IDJ) sa Barangay Nanga, Pototan, Iloilo.
Ini ang ginkumpirma sa Bombo Radyo Iloilo ni Jail Supt. Gilbert Piremne, assistant regional director sang Bureau of Jail Management and Penology (BJMP) Region 6.
Suno kay Piremne, may kahilabtanan ini sa kontrobersiya sa Iloilo District Jail kun sa diin ginapahayag nga madata ang transaksyon sang iligal nga droga sa sulod sang presuhan.
Magluwas sa mga jail guards, ginrekomenda man sang BJMP Region 6 sa Department of Interior and Local Government ang pag-relieve sa jail warden nga si Jail S/Insp. Abner Zamora.
Suno kay Piremne, seryoso ang mga alegasyon batok sa Iloilo District Jail apisar nga wala pa mapamatud-an.
Kinahanglan man suno sa opisyal nga maghulag ang pamunuan sang BJMP sa rehiyon bangud sang epekto sang nasambit nga mga alegasyon, sa imahe sang presuhan.