ILOILO CITY – Ginsaysay sang isa ka manunudlo ang eksperyensiya sini sa pagpang-atake sang Maute group sa Marawi City.
Sa interview sang Bombo Radyo Iloilo, ginpahayag ni Prof. Aisah Minukom sang Mindanao State University, nagapatigayon sila sang klase sang nabatian ang paglinupok gani ila ini nga ginkakibot kag nagbatyag sang kakulba.
Na-trap ang mga ini sa unibersidad rason nga nagpalipas sang gab-i sa buluthuan kaupod ang mga estudyante, sa diin kalabanan sa mga ini ang graduating students kag faculty.
Suno kay Prof. Minukom, ila man nakita nga ginapangsunog ang iban nga mga establishments kag asud-asud nga pagpangbomba kag linupok ang ila nga nabatian.
Gintuyo nga sudlon sang Maute ang Mindanao State University, apang may mga militar nga nagabantay sa tanan nga entrance kag exit points sang eskuwelahan.
Ini man ang rason suno sa manunudlo nga naghatag sang ultimatum ang militar sa mga residente sang Marawi nga mag-evacuate sa mas hilway nga lugar agud nga ila masulod ang ginahamtangan sang mga rebelde nga wala sang may masalabat nga sibilyan.
Nangin mabudlay suno kay Minukom ang paghalin sang mga residente gikan sa Marawi City.
Nabudlayan sila sa pagpangita sang mahimo masakyan padulong sa Iligan City bangud wala sang may nagabiyahe.
Tuman ang pagpug-ok sang trapiko matapos nga linibo nga mga residente ang nagabiyahe agud nga makahalin sa Marawi City.
Ginpahayag sang manunudlo nga 66 ka mga estudyante kag tatlo ka faculty ang kaupod sini kagab-i sa paghalin sa Mindanao State University, apang madamo sa gihapon ang nabilin sa buluthuan.
Mas mabudlay suno kay Manucom bangud total blackout sa gihapon ang Marawi City.