ILOILO CITY – Gindula sang pila ka mga eksperto ang kahangawa sang publiko sa Martial Law nga gindeklarar ni Presidente Rodrigo Duterte sa Mindanao.
Suno kay Fr. Ranhilio Aquino, dean sang Graduate School of Law sa San Beda College, daku ang kinalain sang Martial Law sa idalom ni anay Presidente Ferdinand Marcos sa gindeklarar ni Pres. Duterte.
Suno kay Aquino, ang Martial Law nga ginpatuman ni Marcos ang nasantu sa 1935 Constitution apang ang kay Duterte ang ginbase sa 1987 Constitution.
Ginpahayag ni Fr. Aquino nga sa idalom sang 1987 Constitution, ginbuhinan na ang ginabasehan sa pagdeklarar sang Batas Militar, sa diin ini ang sa tion lang nga may invasion kag rebellion.
Kinahanglan nga indi man maglapaw sa 60 ka adlaw; may Kongreso kag Korte Suprema nga mahimo magbusisi sang deklarasyon.//
Wala man ini nagakahulugan suno kay Aquino, nga suspendido gilayon ang writ of habeas corpus.
Dugang pa ni Aquino, paagi sa bag-o nga Konstitusyon, malikawan ang pag-abusar sa Martial Law, nga amo ang ginakahangaw-an sang madamo nga mga pumuluyo.
Dapat suno kay Fr. Aquino nga hatagan sang “benefit of the doubt” ang Presidente bangud nga naga-uyat ini sang tanan nga intelligence information kag posible nga may rason ini sa pagdeklarar sang Martial Law.