CHR ginpasiguro nga bukas ang mga talatapan sa pagbaton sang reklamo sa Martial Law abuse

ILOILO CITY – Ginpasiguro sang Commission on Human Rights nga nakahanda ini nga magbaton sang mga reklamo sa pag-abusar sang Martial Law sa Mindanao.
Sa interview sang Bombo Radyo Iloilo, ginpahayag ni CHR Commissioner Gwendolyn Pimentel-Gana, anak ni anay Sen. Aquilino Pimentel Jr., nga bukas ang tanan nga talatapan sang CHR sa Mindanao kun may paglapas sa implementasyon sang Batas Militar kun sa diin suspendido ang civil law, civil rights, habeas corpus kag ang extension sang military justice sa sibilyan.
Ginakasubo ni Gana ang nagakatabo subong nga kinagamo sa siyudad sang Marawi.
Suno sa CHR commissioner, nagdako siya sa Mindanao partikular sa Cagayan de Oro kun sa diin malinong sadto ang kaiping nga siyudad sang Marawi.
Wala ginalauman ni Gana nga karon mangin sentro sang engkuwentro sa tunga sang gobyerno kag rebelde ang Marawi nga sang una suno sa opisyal, malinong nga lugar.
Nagpanawagan ini sa publiko nga mangin vigilant agud indi malapas ang tawhanon nga kinamatarong kasunod sang pagdeklarar sang Martial Law sa Mindanao.