ILOILO CITY – Ginkumpirma sang Mandurriao PNP nga yara sa listahan sang High Value Target (HVT) si Punong Barangay Remia Prevendido Gregori, utod ni WV No. 1 Drug Personality Richard Prevendido, sang Bakhaw Mandurriao Iloilo City.
Ginpahayag sa Bombo Radyo ni Police Inspector Juan Tigaronita, Deputy Chief sang Mandurriao PNP, nga magluwas sa kay Punong Barangay Gregori, may iban pa nga yara sa listahan nga ginabanta nagalab-ot mas o menos 20 ka mga taga-Bakhaw Mandurriao.
Gin-athag ni PI Tigaronita nga wala pa nakapakita sa Mandurriao Police Station ang natungdan nga opisyal nga madugay na nga ginaistorya sang pamunuan sang Iloilo City Police Office (ICPO) agud magsungka.
Angot sini, gin-athag sang taghambal sang Iloilo City Police Office (ICPO) ang tinaga nga rehabilitation batok sa mga punong barangay sang syudad nga nagsumite sang ila mga kaugalingon matapos gintumod bilang mga High Value target level 2 sang kapulisan.
Sa exclusive interview sang Bombo Radyo kay Police Senior inspector Shiela Mae Acanto-Sangrines, ginpahayag sini nga ang rehabilitation sang mga nagagamit sang iligal nga druga okon High Value Target Level 1 ang lain sa mga naka line-up nga rehabilitation ukon mga programa sang kapulisan para sa mga Punong Barangay.
Ginpahayag dugang ni Sangrines nga ang panibag-o nga listahan sang ‘Oplan Double Barrel Reloaded’ ang nagikan sa PNP National Headquarters sa diin nalakip sanday Punong Barangay Noemi Hablo sang Desamparados Jaro asawa sang anay Drug Personality nga si Rusty Hablo, Punong Barangay Keith Dabing Espinosa sang Monica Blumentritt City Proper, asawa ni anay Brgy. Kagawad kag PDEA-identified Drug personality nga si Jesus “Jing-jing” Espinosa kag mismo si Punong Barangay Remia Prevendido Gregori.
Dugang pa sang opisyal nga wala nagakahulugan nga kung malakip ang pangalan sang isa ka personalidad ukon Barangay Official makabig na ini nga adik ukon user.
Posible suno sa kay Sangrines nga naangut lamang sila ukon gin-tag bilang protektor sang iligal nga druga.