ILOILO CITY – Ginpasiguro sang pamunuan sang Iloilo United Muslim Community ang ila hugot nga pagsuports sa lihok sang police nga ipasiguro nga wala sang grupo sang rebelde nga makasulod sa rehiyon.
Sa exclusive interview sang Bombo Radyo kay Sultan Sami Hadji Manan sang Iloilo United Muslim Community kag spokesperson sang Muslim Community sang Western Visayas, ginpahayag sini nga kung may mga nagabisita man nga mga Muslim diri sa rehiyon, gilayon nila nga ginapa tsekyar ang background sang mga ini kag ginapasiguro nga indi ang mga ini katapo ukon konektado sa Abu Sayyaf, BIFF ukon Maute Group.
Indi gid maayo nga makasulod sila diri sa rehiyon, suno pa kay Sultan Hadji Manan tungod kagub-anan ini indi lamang sa kalinong kag palangabuhian sang mga tumandok nga Ilonggo kundi amo man sang mga naganegosyo nga mga Muslim.
Nahibaluan dugang sa opisyal sang mga Muslim diri sa Iloilo nga 80% sang mga Muslim diri sa rehiyon ang mga tumandok gid sang Lanao del Sur samtang 20% diri ang naghalin sa iban nga lugar kag iban man nga tribu.
Nauna na nga nagpadulong ang Iloilo City Police Office (ICPO) sa Muslim Community isa ka adlaw matapos mismo sang pagpang-atake sang Maute Group sa Marawi City agud hingyuon ang bulig sang mga ini sa pagmonitor sang mga nagasinulod nga mga Muslim bilang kabahin man sang security precautions sa posible ‘spillover’ sang kalakasan sa rehiyon.