ILOILO CITY – May 16 pa ka priority target ang Philippine Drug Enforcement Agency (PDEA) sa siyudad sang Iloilo.
Suno kay PDEA-6 Deputy Director Levi Ortiz sa interview sang Bombo Radyo, 17 tanan ang priority target apang napatay ang isa nga si Dante Laloma sa Pototan.
Sa mga nabilin suno sa PDEA, may isa diri ka aktibo nga pulis kag isa ka abogado.
Isa sa mga ini nga si Romeo Penecilla ang may yara na sang arrest warrant kag may tatlo tubtob apat nga indi na mamonitor sa siyudad sang iloilo.
Samtang, may yara naman sang anum nga nabilin nga priority target sa regional level.
Suno kay Ortiz, ini bangud nga nadakpan na ang iban nga mga target nga sanday Ednie Jimena, Mohan Mino kag Ricky Fuentes.
Dugang pa sini, sa anum nga regional priority target, tatlo na diri ang may warrant of arrest nga ginalakipan nanday Richard Prevendido, Ernesto Bolivar kag Ana Penecilla nga asawa man sang priority target sa siyudad nga si Romeo Penecilla.