ILOILO CITY – Patay ang 17-anyos nga dalagita matapos maghikog sa Zone 3, Baldoza La Paz, Iloilo City.
Ang biktima ang ginkilala kay Faith Audrey, Grade 10 student kag ika-apat sa lima ka mag-utod.
Sa exclusive interview sang Bombo Radyo Iloilo sa utod sang biktima nga si Pearly Mae, ginpahayag sini nga naakig ang ila nga iloy sang wala ginpati ang iya sugo nga ipa-enroll ang ila Grade 6 nga manghod sa Ingore Elementary School.
Ginbakol sang iloy ang biktima nga ginbatyag naman sang menor-de-edad.
Sa ulihi, wala na nakapauli ang biktima kag nagdumdom lang ang pamilya sini nga nagkadto ini sa balay sang iya abyan.
Apang amo na lang ang ila kakugmat matapos makit-an nga nagabitay na ang biktima sa puno sang indian mango.
Nagapati naman ang tiya sang biktima nga si Gemma nga kagab-i pa naghikog ang biktima.
Suno sa tiya, nylon ang gingamit sa pagbitay sang iya hinablos sa diin posible nga naglumpat ini halin sa mataas nga bahin sang indian mango agud masigurado nga ini ang mapatay.
Nahibaluan nga nag-brownout kagabi sa diin ginhingalitan sang biktima ang kahigayunan agud magguwa sa ila balay kag dayunon ang plano sini nga maghikog.