ILOILO CITY – Gindula sang gobyerno sang Qatar ang kahangawa sang mga pumuluyo sini kag mga dumuluong nga nagatrabaho sa nasambit nga pungsod lakip na ang mga Pinoy, sa tunga sang diplomatic crisis sa Middle East kun sa diin gin-utod sang kaangay nga mga Arab nations ang suporta sa Qatar bangud sa ginapahayag pagsuporta sini sa terorismo.
Sa interview sang Bombo Radyo Iloilo, ginpahayag ni Dennis Gamarcha nga tumandok sang San Lorenzo Guimaras apang sa karon nagatrabaho sa Qatar Airways sa Doha, nga mangin siya ang nag-stock sang mga basic needs kag pagkaon.
Sa iya pagpadulong sa mga grocery stores, nagakaubusan na sang supply apang ginpasiguro sang Interior Ministry sang Qatar nga may nagakaigo nga supply ang pungsod.
Suno pa kay Gamarcha, ginpasiguro sang Qatari government nga maka-import ini sang supplies nagikan sa iban nga pungsod.
Nagapabilin nga bukas suno kay Gamarcha ang mga seaports kag airspace sang Qatar rason nga makasulod gihapon ang mga produkto.
Ginkakibot suno sa iya sang mga pumuluyo sang Qatar kag mangin nila nga mga Pinoy ang gulpi nga pag-utod sang mga kaiping nga bansa sang relasyon sa Doha kag nag-panic ang mga tawo apang ginpanugyanan sila nga mangin kalmado.
Kaangay naman nga may gag order sa mga tawo may kaangtanan sa isyu kun sa diin ginpahayag ni Gamarcha nga sa ila sa Qatar Airways, gindumilian sila nga magkomento may kangtanan sa krisis.
Apang ginpahayag ni Gamarcha nga sa karon luwas ang kahimtangan sang kapin 250,000 nga mga Pinoy sa Qatar.