ILOILO CITY – Nagsabat ang punong barangay sang Kasing Kasing, Molo matapos malakip ang pangalan sini bilang High Value Target Level II.
Ini matapos ginkumpirma sang hepe sang Molo Police Station nga si Chief Insp. Marlon Valencia nga nalakip ang ngalan ni Punong Barangay Gemma Calzado sa mga narco-politician nga ginsumite sa Kampo Crame.
Sa exclusive interview sang Bombo Radyo kay Calzado, gin-athag sini nga wala ini sang kahilabtanan sa pagduging sang iligal nga droga sa iya barangay ukon sa distrito sang Molo.
Gin-ako man sini nga nagkadto sadto sa iya barangay ang napatay nga drug lord nga si Melvin “Boyet” Odicta Sr. kun sa diin iya ginhingyo sa mga tinawo sini nga untatan na ang pagpanggamo sa iya lugar.
Nagapati ang barangay kapitan nga padihot ini sang iya mga kasumpong sa pulitika nga gusto magguba sang iya pangalan.
Nagpakatig-a naman nga magpaidalom sa rehabilitation si Calzado.
Ginpahayag sini nga wala sang rason nga magpa-rehab ini bangud wala man ini sang kaangtanan sa iligal nga droga.