ILOILO CITY – Kaangay sang natabo sang kapanahunan sang pagpakig-away sang mga Pilipino batok sa mananakop nga mga Katsila, indi dapat pagpahanugutan sang mga Pilipino nga magpadayon ang kalakasan nga ginahimo sang terorista nga grupo sang Maute sa Marawi City.
Ini ang kaundan sang mensahe ni Department of Environment and Natural Reosurces (DENR) Secretary Roy Cimatu kadungan sang ginpatigayon nga programa kaina sa Plaza Libertad sa Iloilo City, para sa ika-119 ka tuig nga pagsaulog sang kahilwayan sang pungsod.
Suno kay Cimatu, dapat manindugan Ang mga Pilipino kag indi pagpahanugutan ang iban nga tawo ukon lahi nga maghimo sang kalakasan sa aton mismo pungsod.
Kadungan sini ginkilala man ni Cimatu ang mga pulis kag katapo sang militar nga napatay kag napilasan sa serye sang engkwentro sa Marawi.
Dugang pa sang tiglikom nga dapat mangin mabinantayon ang kada isa kag itib-ong ang kahilwayan nga ginpakigbato sang una batok sa mga mananakop tungod yara man mismo sa aton mga kamot bilang mga Pilipino ang responsibilidad nga mapreserba ang aton kahilwayan.
Samtang nasorpresa naman ang DENR chief sang mahibaluan nga ang ulihi nga grupo sang mga Espanyol nga ginpamunuan ni Don Diego de los Rios ang nagsungka sa Ilonggo nga heneral kag baganihan nga si Martin Delgado o mas kilala nga Tan Martin sadtong Disyembre 25, 1898 sa Plaza Alfonso XIII ukon mas kilala sa karon nga Plaza Libertad, sa diin ginhiwat mismo ang programa kaina bilang paghatag sang kabilinggan sa nangin kontribusyon ni Delgado kag ang bug-os nga Federal Republic of Visayas sa naagom nga kahilwayan.