ILOILO CITY – Ginsug-alaw sang hero’s welcome ang bangkay sang suldado nga Ilonggo nga napatay sa engkuwentro batok sa Maute group sa Marawi City.
Alas-10:00 sang aga sang nag-abot sa Iloilo International Airport ang eroplano sakay ang bangkay ni Sgt. Simeon Plares Jr. nga ginsugat naman sang iya pamilya, mga katapo sang 3rd Infantry Division sang Philippine Army kag mga opisyal sang banwa sang Pototan sa pagpanguna ni Mayor Tomas Peñaflorida kag mga katapo sang Sangguniang Bayan.
Si Sgt. Plares ang tumandok sang Barangay Ubang, Pototan, Iloilo.
Naghilibion naman ang amay nga si Simeon Plares Sr. sang makita ang bangkay sang anak sini.
Sa interview sang Bombo Radyo, ginpahayag sang amay nga ila pa hulaton nga makapauli ang iya bata nga nagatrabaho sa luwas sang pungsod, antis desisyunan ang lubong.
Nabaton na sang amay ang gindangatan ni Sgt. Plares kag nagalaum nga indi na madugangan ang nalagas sa tropa sang gobyerno.
Si Sgt. Plares ang kabahin sang 13 ka mga miyembro sang Philippine Marines nga napatay sa 14 ka oras nga engkuwentro sa tunga sang militar kag Maute sa Barangay Madaya sa Marawi.