ILOILO CITY – Gindagdagan sang Office of the Ombudsman sang isa ka bulan kag isa ka adlaw nga suspension si New Lucena, Iloilo Mayor Christian Sorongon.
Ini ang may kaangtanan sa paghatag ni Mayor Sorongon sang unauthorized mission order sa iya bodyguards agud nga makadala sang armas luthang sang tuig 2016.
Sa interview sang Bombo Radyo kay Iloilo 2nd district Board Member Liecel Mondejar-Seville, iya ginpahayag nga ang local chief executive ang wala sang kinamatarong nga maghatag sang mission order sa iya bodyguards.
Nagapakita lamang ini suno kay Seville nga ginlapas ni Sorongon ang simple misconduct.
Bangud sini, nagapati si Seville nga bisan election period, ipatuman gid sang Department of the Interior and Local Government (DILG) ang desisyon sang Ombudsman nga 1 month and 1 day suspension without pay batok sa alkalde.
Ini bangud nga suno kay Seville, isa ini ka paglapas sa Graft and Corrupt Practices Act ang ginhimo sang iya hugot nga kasumpong nga si Sorongon.
