ILOILO CITY – Sabat sa iya pangamuyo kun ilaragway sang topnotcher sa Nursing Licensure Examination nga si Mary Angelie Cabanez ang iya kadalag-an.
Sa interview sang Bombo Radyo Iloilo, ginpahayag ni Cabanez sang Banga, Aklan nga ginkakibot sini sang mahibaluan nga siya ang nagpanguna sa masobra 11,000 nga nagkuha sang pasinawan sa bug-os nga pungsod.
Apang gin-ako nga iya gid ginpangayo nga mangin Top 1 sa Nursing Licensure Examination.
Nangin inspirasyon ni Cabanez ang iya pamilya para magpanikasog.
Nagpanguna ang West Visayas State University graduate matapos makakuha sang 86.20 percent nga passing rate.
Sa karon wala pa sang plano si Cabanez nga magtrabaho sa iban nga pungsod.
Nahibaluan nga walo ka mga graduates sang West Visayas State University ang nakasulod sa Top 10 sang Nursing Licensure Examination.
Suno sa No. 5 nga si Alyssa Jude Montalban sa interview sang Bombo Radyo, inspirasyon niya ang iloy nga isa ka single mother.
Ginpahayag naman ni Julie Mae Suganob, 7th placer, mas gusto sini nga magserbisyo sa mga kaangay sini nga Pilipino.
Si Julie Mae ang himata sang Ilonggo priest nga si Father Teresito Suganob nga sa karon hostage sang rebelde nga mga Maute sa Marawi.