ILOILO CITY – Nagbaha sang luha sa send off ceremony nga ginpatigayon sa Iloilo International Airport para sa mga katapo sang 82nd Infantry Batallion sang Philippine Army nga magapadulong sa Marawi City.
Emosyunal ang pamilya sang mga suldado kag nagpangibabaw ang kahangawa para sa seguridad sang ila nga himata nga magasabak sa giyera.
Gindul-ong ang mga suldado sang ila mga ginikanan, asawa kag mga kabataan samtang gintambungan man sang mga lokal nga opisyal sang Panay kag ni Monsignor Meliton Oso ang send off ceremony.
Magluwas sa mga tinaga nga “Mag-ingat” kag “I love you”, pangamuyo kag rosary ang ginpabalon sa mga suldado sang ila himata.
Sa interview sang Bombo Radyo Iloilo, ginbilinan ni Maj. Gen. Jonathan Aying, commander sang 3rd ID, ang iya mga tinawo nga magsalig lang sa Ginoo kag magpangamuyo sa ila kaluwasan samtang yara sa Marawi.
Ginhingyo naman ni Aying sa pamilya sang mga ini nga pabaskugon ang morale sang mga suldado kag indi pagtagaan sang problema agud maka-focus sa ila trabaho.
Nahibaluan nga sa karon masobra 1,000 nga tropa sang 3rd ID ang naka-deploy sa Marawi.
Ginpahayag naman ni Lt. Col. Vener Morga, commanding officer ng 82nd IB, magabulig sila sa clearing operation kag sudlon ang ground zero sa Marawi.
Nakahanda na suno kay Lt. Col. Morga ang iya tropa sa anuman nga matabo apang 90 percent sa mga ini ang first time nga ma-deploy sa Mindanao.