ILOILO CITY – Tatlo ka mga miyembro sang Maute group ang nadakpan sa Iloilo port subong nga hapon.
Sa interview sang Bombo Radyo Iloilo, ginpahayag ni Captain Leo Panupio sang Philippine Coast Guard-Northern Mindanao nga nadakpan ang tatlo ka mga militante kadungan sang pagdungka sang barko nga ginasakyan sang mga ini sa Iloilo.
Ang mga nadakpan ang ginalakipan sang duha ka lalaki kag isa ka babaye.
Ang isa nila ka kaupod ang padayon naman nga ginapangita sang mga otoridad.
Suno kay Panupio, gikan ang nasambit nga mga Maute members sa Cagayan de Oro kag nagsakay sa barko nga St. Therese sang 2GO shipping.
Nakita sang Coast Guard sa CCTV ang apat nga pareho ang dagway sa mga miyembro sang Maute santu sa ginpaguwa nga laragway sang militante nga grupo.
Suno kay Capt. Panupio, ginkumpirma anay nila ang identity sang apat kag sang masiguro nga miyembro ang mga ini sang Maute, ila ini ginlagas padulong sa Iloilo.
Pagdungka sang barko diri sa Iloilo, gilayon ang mga ini nga gin-aresto sang Coast Guard ang tatlo samtang ang isa ka upod sang mga ini ang wala madakpan.
Suno kay Panupio, samtang ginapaidalom sa interogasyon, nag-ako ang mga ini nga mga miyembro sang Maute.
Sa karon sa kustodiya pa sang Philippine Coast Guard ang mga nadakpan nga militante samtang ginapaidalom sa imbestigasyon.