ILOILO CITY – Ginpa-eksplikar sang pamunuan sang Police Regional Office 6 ang mga gin-relieve nga katapo sang Maasin Municipal Police Station matapos nga ginsalakay sang kapin 70 ka miyembro sang New People’s Army kahapon.
Ginpalinya kag ginpa-esplikar ni Police Regional Office 6 Personnel and Human Resource Development Division head S/Supt. Louis Garong, isa-isa ang 20 ka mga katapo sang Maasin PNP sa grandstand sang Kampo Delgado kun nga-a nalutsan ang mga ini sang mga rebelde nga grupo.
Suno sa duha ka mga babaye nga police officer nga ginposasan sang NPA, indi nila masarangan ang puwersa sang mga rebelde kag ginkulbaan ang mga ini.
Wala naman mapunggan ni Garong ang kaakig sa mga katapo sang Maasin PNP.
Samtang ginlaslasan ni Regional Deputy Director for Operations S/Supt. Christopher Tambungan ang mga kapulisan sang banwa sang Maasin matapos.
Suno kay Tambungan, kaangay sang Martial Law nga pagdumalahan ang nagakadapat sa mga kapulisan sang Maasin.
Ginpahayag sang opisyal nga sang nagligad lang nga semana, iya ginpadulungan ang Maasin PNP agud paandaman bangud ang banwa ang may pinakamadamo nga sightings sang NPA apang wala ang mga ini nagpreparar.
Kun nahadlok suno sa iya ang kapulisan nga magbato sa mga rebelde, nagakaangay nga sa Marawi na lang ang mga ini gin-assign.
Gintawag ni S/Supt. Tambungan nga wala sang bayag ang hepe sang Maasin police station nga si S/Insp. Ray Cordero kag lawlaw nga lider.