ILOILO CITY – Ginmando na sang alkalde sang banwa sang Maasin, Iloilo ang pagpatuman sang curfew sa banwa kasunod sang pagsalakay sang kapin 70 ka miyembro sang New People’s Army (NPA) sa police station.
Sa interview sang Bombo Radyo Iloilo kay Mayor Mariano Malones, ginpahayag sini nga magasugod ang curfew alas-10:00 sang gab-i tubtob alas-5:00 sang kaagahon.
Gin-athag naman sang alkalde nga ang curfew ang para lang sa mga menor-de-edad kag indi sini sakop ang mga nagatrabaho sa gab-i kag kaagahon.
Sa karon suno kay Malones, nakaalerto ang bug-os nga banwa sa pagpanguna sang Regional Public Safety Batallion nga nagbulos sa mga gin-relieve nga pulis sa ginlusob nga police station.
Samtang ginlaslasan naman sang Regional Peace and Order Council (RPOC) ang Local Government Unit (LGU) sang Maasin, Iloilo sa paglusob sang mga rebelde sa police station.
Suno kay Guimaras Gov. Samuel Gumarin, chairman sang RPOC, nagakadapat nga magbuligay ang LGU kag ang mga otoridad kag indi lang magsalig sa mga pulis.