ILOILO CITY – Gin-athag sang alkalde sang banwa sang Lambunao, Iloilo nga wala sang katapo sang Maute Group nga nakasulod sa ila nga banwa kasunod sang sightings sang armado nga grupo kahapon.
Sa exclusive interview sang Bombo radyo kay mayor Jason Gonzales, ginpahayag sang alkalde nga indi matuod kag indi gid mapatihan ang una na naggwa nga impormasyon nga katapo sang Maute Group ang nakit-an nga lalaki nga makaduluda ang hulag nga nakasuksok pa sang iton nga panapton, nakafatigue, may bag kag may face mask pa nga duag itom.
Suno sa alkalde, posible nga sa laton-laton lang sang istorya naghalin ang teorya tuhoy sa maute Group kag nasobrahan lang sang paglaragway ang mga pumuluyo.
Ginpukan naman sang alkalde ang kahangawa sang mga pumuluyo kag ginpahayag nga kontrolado sang militar kag sang police ang sitwasyon gani wala sang dapat kahangaw-an.
Madumduman nga nagkinagu-al ang mga residente sa mga barangay sang Caninguan kag Walang sang nasambit nga banwa pagkatapos namataan sa lugar ang duha ka ginapahayag armado nga tawo nga nasal-an nga katapo sang Maute Group sang mga residente rason sang pagkansela sang klase sa mga nasambitan nga barangay.