ILOILO CITY – Magapakigsapol ang City District Engineering Office (CDEO) sang Department of Public Works and Highways (DPWH) Region 6 kag sa City Engineers Office tuhoy sa pagkalusod sang dump truck sang Sargaso construction malapit sa ginaobra nga Water Detention Facility sa Jalandoni St City proper sang damlag lang.
Suno kay Engr. Rodney Gustilo sang CDEO, ini agud nga mahibaluan kun ano ang gintunaan sang insidente kag kung ano ang halit nga natuga sang pagkalusod sang truck.
Pagalantawon man suno sa iya kun ano ka dako ang naguba bangud kun gamay lang, mahimo pa ini nga medyusan, apang pananglitan nga tama ini ka dako, indi maggasto diri ang ahensya.
Ini bangud suno sa iya nga indi ini mahimo nga kuhaan sang pondo sa pagpakay-o gikan sa maintenance sang City District Engineering Office, apang nagpasalig man ini nga indi pagpabay-an ang amu nga problema.
Nahibaluan nga una na nga ginhingyo ni Konsehal Joshua Alim ang paathag sang kontraktor kag ang pagpasiguro man sini nga ang lugar nga malapit sa eskwelahan kag madamu sang nagalabay ang safe pa para sapubliko.