ILOILO CITY – Sigurado nga mangin makahalawat-hawat ang boxing fight sa tunga nanday Filipino Ring Icon Sen. Manny Pacquiao kag wala pa sang piyerde nga si Australian boxer Jeff Horn sa ”Battle of Brisbane”.
Ini ang pahayag sang Sports Analyst nga si Quinto “The Dean” Henson sa exclusive interview sang Bombo Radyo.
Suno kay Henson, mas bata, highly motivated kag wala naga-atras si Horn, samtang ang Pambansang Kamao naman ang may tuman ka taas nga level sang eksperyinsya.
Perpekto man suno pa sa “The Dean” ang style ni Horn sa away batok kay Pacman, sa diin dapat halungan ni pacman ang signature right straight ni Horn nga kilala man nga nagagamit sang Olympic Style sa iya mga away.
Sa bahin naman sang Pambansang Kamao, makabig nga bentaha sini sa gihapon ang kadasigon sang hulag kag kabaskugon sang sumbag amo man ang kadamuon sang nakontra sini nga mga mabaskog nga mga boxers.
Lauman suno kay Henson nga magluwas sa mainit nga pagbayluhanay sang inumol, mangin taktikahanay man ang sambuwa sang duha ka mga respetado nga fighters.
Ang Pacquiao-Horn fight ang hiwaton sa Hulyo 2, 2017 sa Suncorp Staidum sa Brisbane, Australia.