ILOILO CITY – Wala na sang kabuhi sang masapwan ang duha ka mga mangunguma sa tunga sang talamnan sa Brgy. Lacaron Sibalom, Antique.
Ginapahayag nga naigo sang kilat ang mga biktima nga sanday Mario Balsomo, 53 anyos sang Brgy. Cabariuan Sibalom, Antique kag Alex Odipa, 42 anyos, sang Brgy Lacaron sang nasambit nga banwa.
Ginpahayag sa Bombo Radyo ni PO1 Dan Labordo, imbestigador sang Sibalom Police Station, nga nasapwan na gid lamang sang mga residente ang duha nga nagahamyangon na sa wayang kag gapalanggit-om na ang lawas nga ila naman gilayon gindala sa Barangay Hall sang Barangay Cabariuan Sibalom, Antique.
Matapos madala sa Ramon Maza Sr. Memorial District Hospital sa amo man nga banwa, nakumpirma nga ang mataas nga boltahe sang kilat nga nag-igo sa mga ini ang gintunaan sang ila gilayon nga kamatayon.