ILOILO CITY – Ginakabig nga pagpanghangkat sang kapulisan sa Western Visayas ang pagtawag ni Presidente Rodrigo Duterte sa Iloilo nga “bedrock of drugs” ukon bagsakan sang iligal nga droga.
Sa interview sang Bombo Radyo Iloilo, ginpahayag ni Police Regional Office 6 (PRO-6) director C/Supt. Cesar Hawthorne Binag nga may basehan ang Presidente kun nga-a gintawag sini nga bagsakan sang iligal nga droga ang Iloilo kag “most shabulized city”.
Nagapati si Binag nga kun madakpan ang no. 1 drug lord sa Western Visayas nga si Richard Prevendido ang isa sa mga pamaagi agud malimpyuhan ang imahe sang Iloilo sa panulukan ni President Duterte.
Kinahanglan man suno sa PRO6 nga malimpyuhan ang ngalan sang mga pulitiko sa Rehiyon 6 nga ginhingadlan nga protektor sang iligal nga droga.
Sa pihak sang banat sang Presidente, ginpabugal naman sang Police Regional Office 6 nga nagapang-lima ini sa performance sa kampanya batok sa iligal nga droga, santu sa assessment sang PNP national headquarters.