ILOILO CITY – Indi big deal para sa mga pumuluyo sang Marawi City ang desisyon sang Supreme Court nga gindeklarar nga constitutional ang Martial Law sa Mindanao.
Sa interview sang Bombo Radyo Iloilo, ginpahayag ni Lanao del Sur Assemblyman Zia Alonto Adiong nga nagaserbe spokesman sang provincial crisis management committee, nga mas ginahatagan sang atensyon sang mga residente sang Marawi nga karon yara sa nagkalain-lain nga mga evacuation centers, ang recovery kag rehabilitasyon sang siyudad.
Suno kay Adiong, mas importante para sa mga evacuees nga matapos na ang kinagamo sa ila lugar agud makabalik na sa normal ang ila nga kabuhi.
Pero ang desisyon sang Supreme Court suno sa opisyal ang isa ka pamatuod nga nagahulag ang Konstitusyon.
Sa karon suno kay Adiong, indi pa makahimo sang full swing operation ang Task Force Bangon Marawi bangud padayon pa ang kinagamo.
Ang gintukod nga task force ang magatutok sa rehabilitasyon sang Marawi sa ti-on nga matapos na ang giyera nga halos duha na ka bulan.