ILOILO CITY – Emosyunal nga nagpasalamat ang pila ka mga recipients sang Bombo Medico 2017 sa siyudad sang Iloilo.
Pila sa mga ini ang nahatagan sang libre nga wheelchair nga dako nga bulig para sa mga ini.
Suno kay Venancioa Pasamanero nga magluwas nga indi makalakat isa man ka bulag, makalibot-libot na ini sa ila barangay gamit ang wheelchair.
Sadtu suno kay Pasamanero, indi siya makaguwa sa balay bangud nga indi makakita kag indi kalakat.
Para naman kay Kim Alter Estalle, pamatyag sini, isa na siya ka lubos nga soltero matapos nga nakabenepisyo sa libre nga circumcision sang Bombo Medico.
Sa kabug-usan, 7,125 ka mga indibidwal ang nakabenepisyo sa Bombo Medico sa Iloilo kun sa diin 3,842 diri ang naka-avail sang libre nga check-up kag bulong; 1,685 sa dental samtang 1,598 naman sa iban pa nga serbisyo.
Ginakabig naman nga fulfillment sang mga volunteers sang Bombo Medico ang paghatag sang libre nga serbisyo para sa mga nagakinahanglan.
Ginpahayag ni Dr. Elvin Tiangha, makapatambok sang balatyagon nga personal nga mabatian ang pagpasalamat sang ila mga nabuligan kag makita nga nalipay ang mga ini.
Isa ka bes lang ini sa isa ka tuig gani bisan oras sa ila pamilya ang adlaw sang Dominggo, ila ini ginasakripisyo agud magpakigbahin sa Bombo Medico.
Ginpahayag naman ni Caroline Yulo sang Philippine Nurses Association, mamag-an sa balatyagon nga makabulig sa isigkatawo, ilabi na kun ila makita ang yuhom sang mga tawo nga ila nabuligan.