ILOILO CITY – Patay ang district engineer sang probinsiya sang Antique matapos ginapahayag gintiro sini ang kaugalingon sa sulod sang iya ginaarkilahan nga kuwarto sa Dungon B, Jaro, Iloilo City.
Ginpahayag sa Bombo Radyo Iloilo ni S/Insp. Tranquilino Querubin, chief of police sang Jaro Police Station, nasapwan na lang sang iya landlady ang biktima nga si Engr. Arnel Rebeta.
Sa pagpangusisa sang kapulisan, ginkadtuan sang landlady ang 54-anyos nga engineer agud pukawon matapos mag-text ang misis sini sa landlady nga pukawon ang biktima bangud wala ini nagasabat sa iya tawag.
May duha ka igo sang bala sa lawas ang engineer kun sa diin isa sa dughan sini nga naglapos as likod samtang ang isa ang yara sa tangkugo.
Narekober sa hulot ang .45 caliber pistol kag duha ka slug sang bala.
Suno kay S/Insp. Querubin, kompleto ang mga gamit sang engineer sa kuwarto sini kag santu sa CCTV, wala man sang nakit-an nga iban nga tawo nga nagsulod sa apartment.
Ginapahayag nga may kaangtanan sa trabaho ang pag-suicide sang biktima samtang natalana nga ipaidalom sa autopsy ang bangkay sang engineer.