ILOILO CITY – Wala nagapati si Antique Rep. Paolo Javier nga may kaangtanan sa pulitika ang ginapahayag pag-suicide sang district engineer sang probinsiya sang Antique nga si Engr. Arnel Rebeta nga tumandok sang Oas, Albay.
Sa interview sang Bombo Radyo Iloilo, ginpahayag ni Javier nga mabug-at ang responsibilidad nga ginapangatubang ni Rebeta ilabi na nga madamo sang proyekto sa karon ang DPWH sa Antique.
Ang pressure sa trabaho ang nakita nga rason sang mamalidha sa posible pag-suicide sang biktima.
Ginpanginwala naman ni Javier nga indi maayo ang relasyon nila sang district engineer kag sang nagligad lang nga inadlaw, magkaupod sila sa inauguration sang isa ka proyekto.
Kasunod ini sang pahayag ni Antique Gov. Rhodora Cadiao sa interview sang Bombo Radyo nga gin-akigan ni Javier si Engr. Rebeta matapos wala siya gin-imbitar sa inagurasyon sang isa ka proyekto sa Antique.
Suno sa mamalidha, ginpamangkot lamang sini si Rebeta kun nga-a wala siya gin-imbitar apang wala niya ini gin-akigan.