ILOILO CITY – Naglab-ot na sa 10 ka drum sang langis ang nakuha sa Iloilo River nga nagtagas gikan sa dredging vessels sang Philippine Ports Authority (PPA) nga nagatakilid sa kadagatan.
Sa interview sang Bombo Radyo Iloilo, ginpahayag ni Jose Sesario Bautista, port manager sang PPA-Iloilo, sang Domingo sang ila naobserbahan nga kada magsulod ang tubig sa makina sang vessel no. 5, may nagakadala nga langis gani gin-umpisahan man ang mano-mano nga pagkuha sini.
Nadugayan naman ang pagkuha sang mga dredging vessels bangud ginahikot pa ang mga papeles sini kag sang nagligad lang nga semana naaprubahan ang pondo para diri.
Naglab-ot sa P2.1 million ang kontrata para sa refloating kag towing sang anum ka mga nagatakilid nga dredging vessels sang Philippine Ports Authority.