ILOILO CITY – Ginpangapinan ni Sen. JV Ejercito ang siyudad sang Iloilo sa mga banat ni Presidente Rodrigo Duterte nga ang Iloilo ang “most shabulized city” kag “bedrock of drugs”.
Sa interview sang Bombo Radyo Iloilo, ginpahayag ni Sen. JV Ejercito nga indi lang sa Iloilo may iligal nga droga gani indi dapat ma-single out ang siyudad.
Problema sang tanan nga urban areas ang iligal nga droga, ilabi na nga international syndicate ang kaaway sang Pilipinas suno sa senador.
Para kay Ejercito, ang pagkadula sang death penalty kag ang pagka-archipelago sang Pilipinas ang pila sa mga rason kun nga-a madata ang illegal drugs sa pungsod gani indi na makatilingala suno kay Ejercito kun tawgon ang Pilipinas nga international hub sang illegal drugs.
Wala naman nagapati ang senador nga mapapas ang iligal nga droga sa idalom sang Duterte administration.
Ginhangkat man ni Ejercito ang China nga kun matuod nga sinsero ang mga ini, dapat nga maghimo sang tikang agud mapunggan ang pagsulod sang illegal drugs sa Pilipinas bangud daku nga bahin sang supply nga nagasulod sa pungsod ang nagikan sa China.