ILOILO CITY – Isa-isa nga nagpaathag ang tatlo ka pulis nga yara sa listahan sang nadakpan nga drug pusher nga si Jackilou Espinosa, sa Gen. Hughes, Iloilo City.
Lunsay ginpanginwala nanday PO3 Christopher Leoner, PO3 Percival Colacion kag PO1 Lyndon Gonzaga nga may kaangtanan ang mga ini sa iligal nga droga.
Suno kay PO3 Leoner, madugay na sila nga magkakilala ni Espinosa bangud isa sila ka buluthuan sugod elementary tubtob High School.
Ulihi sila nga pagkitaay sadtong Enero 2017 matapos nagsumalangay ang ila banas samtang naga-follow up si Leonor angot sa insidente sang pagpangawat sa iya area of responsibility.
Ginpangayo ni Espinosa ang iya numero nga ang tinutuyo amu ang maghatag sang impormasyon bangud masami man ini nga involve sa mga kinawatay sa siyudad.
Sa bahin naman ni PO2 Colacion, nakilala sini si Espinosa sang na-assigned pa ini sa waterfront.
Suno kay Colacion, kilala niya si Espino na isa ka kawatan kag sa hayo sini nga Jackie.
“In good faith” suno kay Colacion, ginhatag sini ang iya nga numero kay Jackie agud gamiton nga asset.
Samtang sa bahin naman ni PO1 Gonzaga, ginpangiwala sini nga nakahatag siya sang iya personal nga numero kay Jackie apang posible may kakilala ini nga naghatag bangud nangin liason ini sang una sa waterfront kag may mga tokhang surrenderer ini nga nahatagan man sang iya numero.
Ginmando naman sang Napolcom sa tatlo ka mga pulis nga magsumiter sang written explanation.
Nakahanda naman ang nasambit nga mga pulis nga ipaidalom sa forensic examination ang ila sim cards.