ILOILO CITY – Nakahanda ang Malacanang nga mag-atubang sa imbestigasyon sang human rights body sang US House of Representatives sa epekto sang drug war sang Duterte administration.
Sa interview sang Bombo Radyo Iloilo, ginpahayag ni Presidential Legal Counsel Salvador Panelo nga kun imbitaron ini sang US Congress, siya mismo ang magatambong.
Ini agud sermunan ang mga mamalidha sang Amerika bangud sa pagpahilabot sang mga ini.
Suno kay Panelo, pagpahilabot sa internal affairs sang Pilipinas ang himuon sang US Congress, apisar wala ang mga ini sang ihibalo sa nagakatabo sa Pilipinas.
Indi man pagsapakon ni Presidente Rodrigo Duterte suno kay Panelo ang nasambit nga imbestigasyon, sa baylo posible nga buyayawon lang sang presidente ang mga mamalidha sang Estados Unidos.
Kalakip sa mga gin-imbitar nga resource persons sanday Ellecer Carlos, spokesman sang iDEFEND Philippines, Matthew Wells nga senior crisis adviser sang Amnesty International kag Phelim Kine, deputy director for Asia sang Human Rights Watch.