ILOILO CITY – Masobra 300 ka sako sang pirated nga CDs kag DVDs ang nakumpiska sa ginpatigayon nga raid sang Optical Media Board (OMB) sa Iloilo.
Sa probinsiya sang Iloilo, 300 ka sako ang nakumpiska sang OMB, samtang masobra 50 naman sa siyudad sang Iloilo.
Ang nasambit nga operasyon ang ginpangunahan mismo ni OMB chairman Atty. Anselmo Adriano.
Sa interview sang Bombo Radyo Iloilo kay Chairman Adriano, ginpahayag sini nga madamo sila sang nabaton nga reklamo sang pagpamirata sang mga pelikula sa Iloilo kag ila ini napamatud-an sang magpatigayon sang surveillance.
Kalakip sa mga lugar nga ila gin-raid ang mga balaligyaan sa Valeria, Ledesma kag Arroyo sa Iloilo City Proper, Gaisano sa La Paz dkag ang Unitop.
Nagapati naman si Adriano nga sa Iloilo mismo ginahimo ang pagpamirata sang DVD.
Napaslawan naman ang OMB nga maaresto ang sa likod sini bangud mahipos ang mga tindera sang gin-usisa ang mga ini kun sa diin nagakuha sang pirated nga mga materyal.
Gindala sa Police Regional Office 6 ang nakumpiska nga mga DVD kag CD agud nga panggub-on.