ILOILO CITY – Nag-surrender na ang suspek nga nagbuno-patay sa mag-asawa sa Barangay Cabuluan Norte, Oton, Iloilo.
Matapos mapatay ang mga biktima nga sanday Woodrow kag Junita Bechaida, residente sang nasambit nga lugar, nagdangop ang suspek nga si Renato Casaria sa direktor sang Jaro Archdiocesan Social Action Center nga si Msgr. Meliton Oso nga nagbulig hikot nga maka-surrender ang suspetsado.
Ginpahayag sa Bombo Radyo ni Casaria nga nagdulom ang iya panulukan kag naubusan sang pasensiya sa mga biktima nga iya man lang bilas, bangud sa ginapahayag pagpahilabot sa iya kabuhi.
Ginpanginwala naman sang suspetsado nga gin-atake ini sang nervous breakdown rason nga napatay ang mag-asawa.
Nahibaluan nga 16 ka mga pilas tuga sang pagbuno ang naangkon sang biktima nga babaye nga ginsulod sang suspek sa banyo samtang nagapaligo, agud patyon samtang 13 naman ka buno ang naangkon sang lalaki nga biktima.
Ginpahayag sa Bombo Radyo sang barangay tanod nga si Reynaldo Celiz nga pakaduha ni Casaria, kasubong nga gin-ihaw sang suspek ang mga biktima.
Ginpahayag naman ni S/Insp. Rey Pabalan, chief of police sang Oton Police Station, madugay na nga may kaakig ang suspek sa mga biktima kay may hiligut-anon ang mag-asawa kag ang suspek.