ILOILO CITY – Nabunutan sang tunok sa dughan si Iloilo City Mayor Jed Patrick Mabilog matapos ang State of the Nation Address (SONA) ni Presidente Rodrigo Duterte.
Ini matapos nga nakaluwas ang Iloilo City sa kritisismo sang presidente ilabi na sa isyu sang iligal nga droga.
Sa interview sang Bombo Radyo Iloilo, ginpahayag ni Mayor Mabilog nga nalipay ini nga ang pag-mention sang Iloilo bangud sa maayo nga rason, matapos ginpasiguro sang presidente nga pasanyugon ang Iloilo port.
Gin-ako sang alkalde nga nagpangamuyo gid ini nga indi ma-mention ang Iloilo City sa SONA agud pakahuy-an.
Nahibaluan nga masami ginatawag ni Duterte nga “bedrock of drugs” kag “most shabulized city” ang siyudad sang Iloilo.
Samtang ginpaboran naman ni Mayor Mabilog ang mga gintalakay ni Presidente sa SONA kaangay sang kampanya batok sa kurapsyon, iligal nga droga kag ang pagduso sang kalinong.
Ginhatagan pa sang grado nga 8.5 ni Mayor Mabilog, ang SONA ni Presidente Duterte.