ILOILO CITY – Ginpaboran sang anay commissioner sang Philippine Commission on Good Government (PCGG) ang kagustuhan sang gobyerno nga i-dissolve na ang komisyon.
Sa interview sang Bombo Radyo Iloilo, ginpahayag ni Iloilo Governor Arthur Defensor Sr., isa sa pinakauna nga mga commissioner sang PCGG, madamo pa ang kaso batok sa pamilya Marcos may kaangtanan sa pagkamal sang mga ini sang kwarta sang publiko.
Apang sa iya nakita, nabudlayan ang PCGG suno kay Defensor sa paglagas sa ill-gotten wealth sang mga Marcos kag croonies sang nasambit nga pamilya.
Masami man nga nagakapiyerde ang mga abogado sang PCGG sa mga kaso batok sa mga Marcos kag mahinay na ang trabaho sang komisyon.
Suno kay Defensor, ang P170 billion nga ill-gotten wealth sang mga Marcos nga nabawi ang wala pa katunga sang nakawat sang mga ini nga kuwarta sang gobyerno.
Ang gobernador ang nagaserbe commissioner sang PCGG sugod 1989 tubtob 1992.
Nahibaluan nga si Defensor ang nagdala sang bulto-bulto nga mga dokumento sang Swiss accounts sang mga Marcos nagikan sa Switzerland padulong sa Pilipinas.