ILOILO CITY – Magapasaka sang kaso batok sa Philippine Drug Enforcement Agency (PDEA) ang nadakpan nga drug pusher nga kaupod sa New Bilibid Prison sang napatay nga drug lord nga si Melvin Odicta.
Ginpahayag sa Bombo Radyo ni Salome Esteves, utod sang nadakpan nga si Octavio Juanga, 57, nga nadakpan sa buy bust operation sa Barangay Guinobatan, Leganes, Iloilo, nga masakit para sa ila ang ginhimo sa iya utod.
Nagpanindugan si Esteves nga wala sang kaangtanan sa iligal nga droga ang iya utod kag ginpasibangdan ang PDEA nga gintanuman sang ebidensiya si Juanga.
Nahibaluan nga nakuha sa posisyon ni Juanga ang apat ka sachet sang iligal nga droga kag P500 nga buy bust money.
Dugang pa ni Esteves, apisar mag-abyan ang iya utod kag si Odicta, wala ini nagakahulugan nga nagaduso man sang iligal nga droga si Juanga.