ILOILO CITY – Temporaryo nga siraduhon sa mga turista ang Tangke Saltwater Lagoon sa kilala nga Isla Gigantes sa banwa sang Carles, Iloilo.
Santu sa Executive Order No. 21 nga ginpaguwa ni Carles Mayor Siegfredo A. Betita, dumilian anay ang pagsulod sang mga turista sa lagoon para sa seguridad sang mga ini bangud dalagko ang balod nga tuga sang habagat.
Pero magluwas sa seguridad, katuyuan man sa pagpasira sang lagoon amu nga hatagan ini sang tiyansa nga makarekober sa normal nga paagi.
Epektibo ang pagpasirado sa lagoon sumugod Agosto 20 subong nga tuig.
Ang Isla Gigantes ang isa sa mga nagapanguna nga tourist attraction subong sa isla sang Panay.
Ginkilala ini bilang isa sa “Most Beautiful Places in the World” sang Forbes Magazine.