ILOILO CITY – Ginhatagan sang ultimatum ang kapulisan sa probinsiya sang Iloilo agud tapnaon ang iligal nga sugal.
Ginpahayag sa Bombo Radyo ni Iloilo Provincial Police Office (IPPO) director S/Supt. Marlon Tayaba nga may 15 ka adlaw nga ultimatum ang kada police station sa probinsiya sang Iloilo agud tapnaon ang illegal gambling.
Suno kay Tayaba, apisar may operasyon na sang Small Town Lottery (STL) sa probinsiya sang Iloilo, madata gihapon ang iligal nga sugal.
Indi lang ang mga chief of police ang mahimo ma-relieve kundi mangin ang tinawo sang mga ini kun mapaslawan nga mapapas ang iligal nga sugal sa gintalana nga deadline.
Sa karon suno kay S/Supt. Tayaba, padayon pa nila nga gina-validate ang impormasyon nga may 6 ka mga illegal gambling operators sa probinsiya sang Iloilo.