ILOILO CITY – Nagtaliwan na ang pinakaulihi nga “Binukot” sang indigenous group nga Panay-Bukidnon diri sa Iloilo.
Ginpahayag sa Bombo Radyo ni Cyrhence Caballero-Santiago, apo ni Rosita Caballero, 73, sang Calinog, Iloilo, nagtaliwan ang iya lola bangud sang komplikasyon sa balatian.
Magluwas sa kidney stone, na-diagnosed si Caballero nga may hepatitis.
Kilala ang “Binukot” nga tradisyon sang mga katutubo sa Panay.
Ang “Binukot” ang nagakahulugan nga tinago.
Sa sini nga kultura, ang mga manggaranon nga pamilya ang ginatago sa publiko ang ila pinakamatahom kag maalam nila nga bata nga babaye nga ila ginatawag nga “Binukot”.
Ang makakita lang sa “Binukot” amo ang iya pamilya kag indi ini mahimo makita sang iban ilabi na sang mga lalaki.
Kun magguwa sa puluy-an, kinahanglan nga putson sang tela ang isa ka “Binukot” agud indi makita sang tawo.
Wala man ginapahanugutan nga magtrabaho sa sulod sang balay, sa baylo ginatudluan sang tradisyunal nga mga saot kag sang kultura sang mga tumandok.
Sila ang ginakabig nga source kag nagatago sang kasaysayan sang mga tumandok.
Para sa mga nagapangaluyag, ang punta sang tudlo lang sang isa ka “Binukot” ang mahimo makita.
Ang makapangasawa lang sang “Binukot” ang lalaki nga makahatag sang pinakadako nga dowry sa ginikanan sang ginakabig nga prinsesa, apang makita lang nila ang nawong sini kun sila ang ginkasal na.
Apang sa pagtaliwan ni Caballero, isa ka pamangkot sa karon kun sin-o ang mapadayon sang pinasahi nga tradisyon sang mga katutubo sa Panay.