ILOILO CITY – Gin-athag sang kampo sang broker nga si Mark Ruben Taguba nga wala ini sang iban nga motibo sa pagbuyagyag sang iligal nga mga nagakatabo sa Bureau of Customs (BoC).
Sa interview sang Bombo Radyo Iloilo, ginpahayag sang abogado ni Taguba nga si Atty. Leoncio Superio nga wala sang kalain sang buot ang iya kliyente kay Customs Commissioner Nicanor Faeldon.
Sa pagkamatuod suno kay Superio, negatibo ang epekto sini sa negosyo ni Taguba.
Suicide suno kay Atty. Superio ang ginahimo sang iya kliyente apang wala sila sang pilian bangud nga ini ang ginatudlo nga nagpalasik sang P6.4 billion nga balor sang shabu gikan sa China, kag ginpatawag sang Kongreso.
Kun sila lang ang masunod suno kay Superio, gusto nila nga maghipos na lang agud indi na mahul-an ang negosyo sang iya kliyente.