ILOILO CITY – Kakason na sang Iloilo City Police Office (ICPO) sa drug watchlist ang 38 ka mga drug personalities.
Ini ang ginalakipan sang 19 ka mga high value target (HVT) kag 19 ka mga street value target (SVT).
Ginpahayag sa Bombo Radyo Iloilo ni ICPO director S/Supt. Remus Canieso nga ginhingyo na nila sa Iloilo City Anti-Drugs Abuse Council (ICADAC) nga magpaguwa sang resolusyon para sa pagkuha sa listahan sang pangalan sang nasambit nga mga personalidad.
Suno kay Canieso, indi na makita sa ila lugar ang nasambit nga mga personalidad rason nga kakason na lang sa watchlist.
Kadungan sini, ginpahayag sang IPPO director nga dapat magpaguwa man sang sertipikasyon ang mga barangay nga indi na makita sa ila lugar ang mga drug personalities nga ini.
Apisar sini, ginpasiguro ni Canieso nga padayon nga monitoron sang mga otoridad ang hulag sang nasambit nga mga drug personalities.
Suportado naman sang Philippine Drug Enforcement Agency (PDEA) ang lihok sang PNP.