ILOILO CITY – Patay ang isa ka mangunguma matapos ginluthang sang barangay tanod sa Barangay Tipacla, Ajuy, Iloilo.
Ang biktima ang ginkilala nga si Michael Delantina, 28, may asawa kag residente sang nasambit nga lugar.
Sa interview sang Bombo Radyo Iloilo kay C/Insp. Charlie Sustento, hepe sang Ajuy Municipal Police Station, ginpahayag sini nga madugay na nga may hiligut-anon ang biktima kag ang suspek nga si Bimbo Siran.
Ang ginhalinan sini amu ang pagpaharab sang karbaw sang amay sang biktima sa duta nga ginapanag-iyahan sang suspek.
Samtang pauli ang biktima kagab-i, ginlambatan ini sang suspek kag ginpaarakan sang luthang gamit ang .45 caliber pistol.
Pilas sa tiyan, tiil kag siko ang gin-angkon sang biktima nga dead on arrival sa ospital.
Narekober naman sa ginluntaran sang insidente ang isa ka fired cartridge kag isa ka live ammunition sang .45 caliber pistol.
Kaso nga murder ang atubangon sang suspek nga sa karon preso sa Ajuy Police Station kag gin-ako nga ginplanuhan sini ang pagpatay sa biktima.