ILOILO CITY – Indi lang ang anak ni Presidente Rodrigo Duterte nga si Davao City Mayor Paolo Duterte ang nagamit sa kurapsyon sa Bureau of Customs (BoC).
Sa interview sang Bombo Radyo Iloilo, ginpahayag ni Atty. Leoncio Superio, abogado sang Customs broker nga si Mark Taguba, nga madamo sang miyembro sang gabinete sang Duterte administration ang nagamit sang mga nagatanyag sang serbisyo para mapadasig ang transaksyon sa BoC kabaylo sang kuwarta.
Apang nagpamalibad nga magdetalye ang abogado sa mga Cabinet members nga nagamit sa kurapsyon sa BoC.
Kaangay sang Davao Group nga nagapakilala may koneksyon kay Vice Mayor Duterte, nagahambal man ang pila ka grupo nga malapit sila sa isa ka Cabinet secretary kag may koneksyon sa sulod sang Customs.
Suno kay Atty. Superio, indi na importante sa iya kliyente kun nagasugid ang mga ini sang kamatuoran ukon wala, bangud nagahatag lang ini sang kuwarta kag naubra man sang mga fixers ang trabaho.
Samtang ginkalipay naman sang abogado ang pag-atubang ni Richard Tan kag Kenneth Dong sa imbestigasyon sang Senado.
Ginpahayag ni Atty. Superio nga kaangay nga vindication ini para kay Taguba kag ginpanindugan nga wala sang ihibalo ang iya kliyente sa P6.4 billion nga shipment sang shabu nga nakalusot sa Customs.
Nagapati si Superio nga may mga personalidad pa nga wala ginahingadlan si Tan, nga may kahilabtanan sa pagpalusot sang illegal drugs.