ILOILO CITY – Kampante si Ms. Philippines-Earth Eco Tourism 2015 Jona Ili Sweet nga makuha sini ang titulo sa Miss World Philippines 2017.
Sa interview sang Bombo Radyo Iloilo sa 22-anyos nga beauty queen nga tumandok sang Aklan, ginpahayag sini nga apisar kadam-an sang 35 ka mga candidates ang beterano na sa pageant, wala ini makabatyag sang kahadlok kag wala ginakabig nga threat agud makuha ang korona.
Ginhalimbawa sini ang aktres nga si Wynwyn Marquez kun sa diin madamo ini sang fans apang nagapati si Sweet nga may kaugalingon man siya nga assets.
Suno sa beauty queen, nag-resign ini sa iya trabaho bilang General Services Officer sa retirement village sa Sydney, Australia agud mag-focus sa Miss World Philippines 2017.
Kun magmadinalag-on, gamiton sang Filipino-Australian beauty ang korona kag titulo agud makaimpluwensiya sa mga tawo agud makabulig sa mga tigulang nga napabay-an sa ila pamilya.
Inspirasyon ni Sweet sa pagpasakop sa Miss World Philippines ang iya pamilya kag boyfriend nga all out support sa iya.
Nahibaluan nga si Sweet ang ginkoronahan man nga Miss Iloilo Paraw Regatta Earth 2015 nga nangin dalan agud nga makapasakop ini sa Miss Philippines Earth 2015.
Hiwaton ang coronation night sang Miss World Philippines 2017 sa Setyembre 3 sa Mall of Asia Arena kun sa diin ipasa sang modelo nga si Catriona Gray ang iya korona.